حلوه كرات بيسان لادو الشهير
وصفة اليوم من صحتي بصحني..." حلوه كرات بيسان لادو الشهير" مع هدى منذر
وصفة اليوم من صحتي بصحني…” حلوه كرات بيسان لادو الشهير” مع هدى منذر
أشهر وأطيب طريقة لادو الهندي بالهيل والمكسرات، هي بيسان لادو (Besan Ladoo)، بطحين الحمص والمكسرات والهيل.
هي يلي بيحضروها بالهند بالأعياد.
بيسان لادو بالهيل والمكسرات الطريقة الأصلية
المقادير:
كيلو تقريبا، يعني حوالي 30 حبة
500غرام طحين حمص ناعم، Besan، هو سر الطعم
250غرام سمنة بلدي، أو زبدة حيوانية نوع ممتاز
300غرام سكر بودرة ناعم جدا بينضاف بآخر شي
1 ملعقة صغيره هيل مطحون ناعم الهيل هو يلي بيعطي الريحة الهندية المميزة
50غرام لوز + 50غرام فستق + 50غرام كاجو، مجروشين خشن
رشة زعفران ، بتعطي لون وطعم فخم
طريقة التحضير:
أولا:
تحميص الطحين:
سخني السمنة على نار هادية جدا بطنجرة تيفال واسعة، ثم ضيفي طحين الحمص وبلشي تحريك مستمر، هيدي أهم خطوة وبتاخد 15-20 دقيقة.
اللون لازم يصير ذهبي فاتح وريحته تصير متل البسكويت المحمص. إذا استعجلتي وعليتي النار بيحترق من برا وبيضل ني من جوا.
ثانيا:
إضافة المكسرات:
لما يوصل اللون للذهبي، ضيفي المكسرات المجروشة والهيل والزعفران، وقلبي دقيقتين بس حتى تتحمص المكسرات شوي وتطلع ريحتها، وبعدين طفّي النار.
ثالثا:
التبريد:
خلي الخليط يبرد 15-20 دقيقة ليوصل من دافي مائل للبارد. لازم تقدري تمسكيه بإيدك. إذا ضفتي السكر وهو سخن رح يسيح ويخرب القوام.
رابعا:
إضافة السكر والتشكيل:
ضيفي سكر البودرة واخلطي بسرعة، وبعدين خدي كمية ملعقة ولفيها بإيدك متل كرة ناعمة. إذا كان الخليط جاف زيادة ضيفي ملعقة سمنة دافية. إذا طري زيادة خليه يبرد أكتر.
خامسا:
التقديم:
خليهم يبردو تماما، وحطيهم بعلبة محكمة. بيقعدو 3 أسابيع برا البراد.
أسرار بتخليهم أطيب لادو ذوقتيهم:
النار هادية دايماً، الاستعجال بيحرق الطحين وبيخلي طعمة مرّة.
السمنة البلدي: الفرق بينها وبين الزيت أو الزبدة الصناعية كبير بالطعم.
السكر البودرة: السكر العادي ما بيدوب وبخلي الحبة محببة.
ما تعجني كتير بالإيد: بس لمي الخليط حتى ما تطلع السمنة زيادة.
النتيجة: لادو بتذوب بالتم، ريحة الهيل والسمنة بتجنن، وقرشة المكسرات بتعطي توازن.
وأعياد مباركة للجميع من أسرة بكفيكم
