خواطر اليوم
خواطر اليوم: الأيام بتركض ركض…
من بعد ما وصلتهم على المطار…
ودعتن بالدمعات والغمرات، على أمل نرجع نلتقي…
بعد ما كنا مجتمعين…
إخوي وخيات وولاد وأحفاد…
ولما فتت على البيت ولقيته فاضي..
من الضحكات، وعجقة الركض ورا لولاد…
وين صوت خيّ يقول يا إختي جبيلي هل فحمات…
ومرت خي تقلي معاش تغنجي هل بنات…
وإمي تعيطلي لساعدها بلف ورقات العريش…
صرت إتحسر كيف خلصت هل العطلة، وما شبعنا منهن…
ولقيت ألعاب لولاد تحت الكنبايات، وغراض البيت مفركشه وفش غرض بمحله…
ما أجمل هل جمعات وعجقتها، من القلب الهم بتشيل.. وبتزرع فرحتها…
عتبي…
عتبي على الغربة يلي للعائلة شتَّتِا…
ولقمة العيش بالفراق غمّاسِتا…
هيدي حالنا بهل الوطن الحبيب…
مكتوب علينا نعيش مغرَّبين، وبنار الشوق مكويّن…
وبعد كل فرحة بزيارتهم…
نزعل على فَلِتْهم….
بقلم: رباب وليد الأحمدية
