باسيل للحكومة: “الوضع الذي كان موجودًا في السابق أفضل من الوضع الحالي الذي أوصلتونا إليه”
باسيل للحكومة: “الوضع الكارثي الذي كان موجودًا في السابق أفضل من الوضع الحالي الذي أوصلتونا إليه”
كلمة رئيس التيار الوطني الحر النائب جبران باسيل في مؤتمر “مرصد الحكومة”:
شو قلتوا؟ وشو عملتوا؟ سؤال موجّه للحكومة بعد 19 شهرا على وجودها وهو عنوان لقائنا بمجلس النواب اليوم لأن نوابنا ما سُمح لهم يعملوا مداخلاتهم بجلسة المناقشة العامة للحكومة.
نحنا فنّدنا اقوالكم، وأفعالكم أمام اللبنانيين ليكونوا هم الحكم، وعنا لائحة بـ 64 مخالفة للبيان الوزاري؛ بالمقابل نحنا ما رح نكون معارضة هدّامة، بالعكس عم نطرح الحلول الممكنة البسيطة، ولكن فيها مصارحة ومكاشفة للرأي العام عن قدرتكم وارادتكم.
شو قلتوا بقضية انفجار المرفأ؟ وشو عملتوا غير إنكم شوّهتوا وضيّعتوا الحقيقة بتسريباتكن المسيّسة والاستنسابية. الحل البديل: طلّعوا القرار الظني، واعملوا قانون بوضع مهل للقرارات الظنية والأحكام.
شو قلتوا بالكهرباء؟ وشو عملتوا غير إنكم افرغتوا جيوب اللبنانيين ووضعتوهم تحت رحمة ومزاج أصحاب المولّدات لأنكن قرّرتوا تطفوا المعامل! 185 مليون دولار بالسنة زيادة للمولّدات عن كل ساعة كهرباء ما بتعطوها. خطّة واحدة ما عملتوا، مشروع واحد ما نفّذتوا.
اليوم رجعتوا لشعبويّتكم، عم تطلبوا من مجلس الوزراء تخفيض 300 الف ليرة على البنزين بالوقت يلي انتوا وضعتوها، وبالوقت يلي هيدي صلاحيّتكم وفيكم تشيلوها من دون مجلس وزراء، متل ما نحنا عملنا… بس انتوا متقصدين تعملوا مشكل بالحكومة لتقولوا “ما خلّونا”.
الحل السهل بموضوع الكهرباء دوّروا المعامل الشغالة يلّي نحنا انشأناها، واعملوا الجباية اللازمة من دون ما تكلّفوا الدولة أي عجز لأن نحنا تركنا لكم تعرفة تسمح لكم ان تشتروا فيول لتشغّلوا المعامل من دون دعم من الدولة.
